أريد وياك يوليدي أودعنك
أريد بلهفه اشمنك
يبعد الروح اخذ جبدي
جسر للغري اعبرنك
اجيت وياك لا تكدر
ترجعني ولا اكدر أرجعنك
ردتك ثخر للفن
يوم الشدة أحشمنك
اجيت وياك وبكلبي ألف ذكره
وكل ذكره عزيزه وبيهه اذكرنك
يلفني أصباك يوم بوسط كاروكك أندهنك
والولي عليك وأنت تنام
وأمك ما تنام الليل
تضحك لو ضحك سنك
يجابلها الكمر وتنوح لو شافتك متغير
تظل مثل الحمامه تدور
نوبه بروحها تغطيك
ونوبه تشيلك وتنحب
وابدن ماتغمض عيونها عنك
تهز وترجز الاشعار
عزيز انت ولدي واشلون اعوفنك
يريحانة وفه بعمري
اجيت وياك وشراع الحنين يرف على متوني
ويعثرني درب النجف كل ساع
بس صورتك تملي صفحة عيوني
تعال وشوف دموعي التلالي
الناصريه هاي يوليدي
وبعد لحظات نركب بالقطار الجاي
خل دلالي يبرالك
لون تعثر يصيح اسم الله كوم وياي
ولو تعطش يل المدلل
يكصر دم الك مو ماي
عزيز عزيز عزيز
عزيز وبيش اوصفنك
وحيدي وروحي وجلاي
كل جلمه كحلتها اليوم ضلت للزمن تذكار
ياعزيز الناس تنشدني
جا وين المدلل صار
ودعته كبل مده
ودليلي كام يلهب نار
كلي يمه اذكريني
لو صديتي باب الدار
جنت اكعد على العتبه
واتناغه وي ولد الجار
اضحك للشمس ضحكات
وابوكن منها اسرار
وكللهه ما اريدج ولا اريد الفرح يندار
ملاحظة ... كم قصرت يا ابي ماجد عندما زرت الراحل في بغداد واستصحبتني معك ياريت لم اتعرف عليه لكي لا افجع برحيله لم ولن استطيع نسيانه والله فهو جدي الحنون ومازالت كلاماته في اذاني ترن محمد دير بالك على دراستك وساعد ابوك ولا تعصي له امرا .
رحم الله شيخ الفنانين والمسرحيين جدو عزيز عبد الصاحب . |
