الوطن لا سامح الله ولو رحت يوم
بعدد دكات قلبي أرجع وأزوره
وأكل للناس رايح للوطن ذاك
الكبل ما توصله يبوسك شعورة
أريد أوكف بكاعه ومحد وياي
وأحط جفي عله جتفه وأكص صورة
وأشيل الصورة بيدي وأكل للناس
العراق بكبره كص وياي صورة
أنا العاشك وطن وجه الشمس ؛ جان
لجماله شما تصد تبجي النواظر
وأذان الفجر صوته يمر عله الناس
وشعر الليل ونجومه الضماير
يجرحونه الوطن ويطيح مجروح
و يصب عل كاع من جرحه مشاعر
حرام انته ويه تاجك ينلبس سيف
العراق اليوم كون يقوده شاعر
وسلام الله عله ترابك يمهيوب
وسلام الله عله كاعك ذرة ذرة
بحر دم غركك من زاخو للفاو
وأشوفك يا وطن جن وردة حمرة
يمن جنه عله كاعه صغار وكحين
وعبث حبه شكثر رادوني أنكره
يدفعوني عله صخره وآنه مجروح
وأخاف من الجرح ينلجم صخره
ويسألوني شكثر بالغربة تشتاك
الوطن وصفنه حالك من تذكرة
وآنه بكاع الغرب من كثر الاشواك
ردت نهر الفرات بجفي أحفره
علي مرت ليالي شكد بلياك
يغطيني الحزن وأغفه عله جمرة
وأفز ومن كثر مابيه الك شوك
البلابل فوكي جنها تصيح بصرة |
