* بمناسبة شهر رمضان المبارك نهنىء ابناء وطننا في الداخل والخارج وانشاء الله يكون هذا شهر خير وبركه ونهايه لاعمال القتل ضد ابناء بلدنا ويحل الله المحبه والالفه بين الجميع .
*تتقطع القلوب ونحن نسمع اصوات النساء والاطفال من اهلنا في منطقة هور رجب وهم يستغيثون من هجوم من حيوانات مجتره من القاعده ولا مجيب من اخوانهم ولا من القوات العراقيه ولا الامريكيه التي لا تبعد عنهم الا القليل ، هؤلاء انتفضوا على الافغان والعرب من حيوانات القاعده بعد ان ذاقوا الامرين منهم ، المجرمين ذبحوا الاطفال والنساء كعادتهم ووضعوا رؤسهم على اجسادهم ولاحقوهم بالقصف بالهاونات وهم هاربين في البراري لعن الله هؤلاء الاوباش ، وشكرا لاهلنا في ابو دشير لفتحهم الابواب لاهلهم متناسين ما حاول الكثير من تفرقة هذه الامه الى ملل وطوائف.وسيبقى شيعي ابو دشير وسني هور رجب اخوان رغم انوف الاعداء ، يااهل ابودشير ويااهل هور رجب عليكم بالرد الحاسم ولا تعتمدوا لا على الجيش ولا على الامريكان نظفوا هذا البلد من مجرمي القاعده وكل من يحمل السلاح لقتل العراقيين .
* نائب رئيس الجمهوريه الشيخ المعظم طارق الهاشمي نقض 19 من مجموع قرارات مجلس النواب ال21 اي ادري بعد شكو مفتحين يامجلس النواب خلي كل واحد منكم يروح لشغلته ولو مااتسوها لان موقعكم يدر الكثير اذا ما قورن بالبسطه بشوارع بغداد ، ياهاشمي دورك مخرب لو عندك اعتراض .
*القاضي راضي وهو بمنفاه الجديد في الولايات المتحده الامريكيه كام يصرح مناك ويكول ان مفتش عام وزارة الصحه بالتعاون مع موسى فرج ابعدوا كل الاطباء والخيرين وتلفيق تهم عليهم في النزاهه ، ياقضي انت اول من تتحمل ابعاد هؤلاء كما تعاونت مع مفتش عام وزارة النقل بابعاد كل العناصر الشريفه والنزيهه واذا اكو واحد متهم فانت الاول .
* دورة طياري العراق المدنيين الجدد الان كاعد يستلفون من الاخرين الاموال بعدها باسبوع راح يوكفون بالساحه الهاشميه بعمان يكدون (اعينوه اعانكم الله ) ، كرة عيون الحكومه الموقره ، شويه من بوك الساده الوزراء انطوا رواتب لهؤلاء الصبيه حيث صار 3 اشهر بلا راتب ‘ لعد اذا ما تردون تنطوهم رواتب لا قيم الركاع هوايه راح ادزوهم يكملون دراستهم حتى يصيرون طيارين وانتم تعرفون ستة اشهر اذا ما يرسلون لاكمال دراستهم تسقط شهادتهم ، واذا بكلبكم شي كلولهم ورفعوا عنهم الكفالات حتي يشوفون طريقهم الذي يريد يكمل على حسابه افتحوا الطريق امامهم هسه ورطتوهم وطيحتوا حظهم وخليتوهم يتركون دراساتهم في الجامعه، تره الدوره السابقه العدو البعثي ارسلهم لاحسن الاماكن من انكلترا الى سياتل في امريكا وطلعوا احسن الطيارين يشار لهم بالبنان اما انتوا الى عمان وهلمره بلا راتب خليكم ملتهين باموركم وبحسابكم في البنوك .
* هيئة علماء المسلمين ( جماعة الضاري ) تدعوا وبشكل صريح للحرب الاهليه حيث تناشد 8 مليشيات متعاونه معها بالاستعداد بالوثوب للسلطه وتكول عليكم بحمل السلاح ولا تتفرقون لان موعد رحيل الامريكان قريب وسوف نستعمل السلاح للوصول للحكم ولا ندع الاخرين ان ياخذون هذا الحق فانه لنا وحدنا، وتستعمل الهيئه لفظ احتلال ولفظ قوات الشرطه والجيش ولفظ اخر عجيب وهو العدو منو العدو ياضاري وراحت ذيج الايام الانفراد بالسلطه وترك الاخرين ، الحل هو تغير الوضع الحالي بابعادك مع زبانيتك وتاخذ وياك العمايم السوده والهاشمي ، العراق يجب ان يحكمه الطيبين من اهله الغير متحيزين والتحيز فقط للوطن .
*اثناء الزياره الشعبانيه قام الاعداء السنه بحماية الطريق لاخوانهم الشيعه في مناطق المحموديه والى المسيب ، فهنيئا للاعداء السنه والشيعه وبادره ذكيه من رئيس الحكومه حيث اسند قيادة العمليات لوزير الدفاع السني وقام بتعين ضابط سني بادارة غرفة العمليات في كربلاء ،وتعين الاستاذ مثال الالوسي رئيس لجنة تقصي الحقائق وهذا الرجل لا يعرف ابوه بالحق اختيار موفق بتكليف هؤلاء بادارة امور مدينة كربلاء لانها لكل العراقيين وليست ملك طابو لاحد .
* امانة العاصمه كاعد تشتغل زين في مدينة بغداد احد المتغامزين يكول اي وبوك هوايه ‘ يابه هسه اشتغلوا وبوكوا احسن من البوك بدون عمل ، نشد على ايدك امين بغداد وفوت بطريقك .
*محطة كهرباء ضخمه المفروض تنبني بالزبيديه وتخصيصاتها موجوده بس وزارة الكهرباء الموقره اتجر واتعر ويه الشركه الصينيه ليش ما تدري الله يعلم يجوز الكوميشن قليل وهذوله الصينين الظاهر مصالوه وما يدفعون زين تره اصير ناصريه واكشف الامور اكثر. |
