*اعلن الناطق الرسمي باسم الحكومه علي الدباغ مقررات مجلس الوزراء ليوم الاربعاء 19/ 9 ومن ضمنها تشكيل لجنه لشراء طائرات مدنيه للعراق برئاسة وزير التخطيط وعضوية وزير النقل وكاله ووزير الصناعه وممثل من الرقابه الماليه والنزاهه . بحضي وبختي خوش لجنه لان علي بابان رجل نزيه وكفوء ومثقف ومن عائله معروفه لا يتقرب الى الفساد ابدا وكذلك الحال لشيروان الوائلي رجل متمالك ورصين وبعيد عن الفساد وهو وزير النقل وكاله .

هواية انضربوا بوري لان صار اكثر من سنه هوايه عاقدين الامال عليها لانها قد تكون اخر البوكات لهذه المافيات ، مافية وزارة النقل بقيادة مفتشها العام ‘ ومافية الكبير احمد الجلبي ، وكذلك المدير العام مال الخطوط لان رتب ويه جماعته بالامارات و3 ملاين دولار طارت منك ياصابر ، مستشاري المالكي والذين لعبوا لعب في هاي المناقصه وحضروا المعلف والحصان انضربوا بال .... . ولو شراء طائرات مستعمله لا يجوز بالقانون العراقي بس خاطر تخلص الخطوط من التدمير بسبب سيطرة البعض على مقدرات هذا القطاع بحيث لا لشراء الطيارات لان ضرب الفلوس بالتاجير ، وخطيه المدير العام السابق راح بالرجلين لان الشريف ينداس بهل الوكت الزوج يحب بلده بالهل الوكت الادغم، وخطيه بالتعاون مع نزاهة قاضي راضي جفتوا بقضيه وازاحوا ولحد الان يريد الرجال يدبر فلوس المحامي على قضيته وما يكدروعلى قضيه مضحكه اكوله الكم : كل السنوات نقل الحجاج خساره للخطوط ومشاكل لا حصر لها الا سنه 2005 ربح مليونين وربع ونقل اكبر عدد من الحجاج بتاريخ الخطوط وشكر من السلطات السعوديه لعدم وجود مشاكل وسعر بطاقه للحاج 450 دولار السنه كبلها خسارة مليون ونص والسنه البعدها سعر البطاقه 850 دولار وانترك الحجاج في جده رئيس الوزراء يرجع الحجاج على حسابه والذي ينحال المدير العام السابق الشريف الذي حقق الربح من الحج وكذلك ربح عام 45 مليون دولار خلال اشهر وهسه ولا باره بالخطوط ، وين حالوا، للنزاهه وشتردون روحوا اعملوا وطكوا راسكم بالحايط وخلي الوطن يفيدكم الجماعه يمارسون رياضة البوك، حقهم الطبيعي ويطلعون الخمس من هالدائره .

*سيقوم السيد رئيس الوزراء المالكي حفظه الله ورعاه بزياره الى ارض الكنانه في الولايات المتحده الامريكيه الاسبوع القادم ، بس اخاف يروح وبعد ما يجي ويطلب اللجوء هناك كما سواها القاضي راضي عليه يجب على مجلس النواب (نقطة نظام ) ان يسن قانون: رئيس الوزراء يروح للعباس يحلف (وحق العباس ابوا راس الحار) ارجع بعد الزياره والجماعه من السنه لجامع ابو حنيفه ويكولون (وحق راس ابو حنيفه) ارجع وما اسويها مثل القاضي راضي، بعدها مدير الجوازات يطمغ جوازاتهم ، يمعودين والله ما بينه حيل الى اي هزه وخاصه قناة الشرقيه المعظمه كاعده بالمرصاد .

* علاوي نصحتك عدة مرات ان اتحاول اعادة الانتخابات ولا تدخل بتحالفات جديده لا ويه التوافق ولا ويه البعثين ، ادري ياعلاوي تدري اني شكد متندم انطيتك صوتي ودائما اكول زوج انطيتك صوتي، ادري تحالف ويه التوافق يعني تطلع من طائفية الائتلاف تدخل بطائفية ابو السداره لعد اشسوينه ، هالمره اجتماعات ويه بعثية عزة الدوري وهذا الرجل اكثر القياده البعثيه منبوذ ومكروه من الشعب وما ننسى هاي الحجايه عليه : لما ماتت ام صدام (صبحه) تعرف الجماعه الرفاق لكلكه فالشهيد طه رمضان لابس دشداشه بيضه وموزر نفسه يوزع كهوه وطارق عزيز موزر ويوزع جكاير الرئيس انتبه كال وينه عزت ، كلوله سيدي شاك هدومه ويلطم ويه النسوان .

* الكلاب اوفياء ليش ما نخلي الكلاب تحرس انابيب النفط لانها اوفى من الانسان وما بيهه لا اختراق ولا تابعه لمليشيا ولا هم يحزنون حتى نحافظ على الثروه الوطنيه اولا ولتوفير الوقود للناس التعبانه خاصه وان المقاومه الشريفه والمجاهدين الابطال فجروا انبوب النفط العابر لنهر دجله وهالمره موبس خساره وانما تلوث لماء دجله فتحيه للمقاومه الشريفه وللمجاهدين في سبيل الله الذين قاموا بالتفجير في هذا الشهر الحرام ونكول والله الجلاب اشرف منكم .

* مجلس النواب عقد اجتماع يوم الخميس نقلها التلفزيون وابو سداره نازع سدارته ومفرع عسى ان يكون خير والرجال نزع هدوم الطائفيه وانشاء الله الايام الجايه جماعة العمايم هم ينزعون العمايم عليش خاليها ، والهادي الله.